Seite wählen
what a world without horns…
plattetoufi „bad as usual“, boris pilleri’s jammin, mühli hunzike, rubige.
dasch agseit gsi u das hets ou gä u das ire wahnsinnsqualität, schlichtwäg „mind-blowing“.
sit achtzäni gäng säuber öpe ire band gsi, hani mängs gse, internationau u hiesigs.
das macht mi wäge däm no lang nid zumene musigkritiker aber „boris pilleri’s jammin“ si für mi uf ougehöchi mit bands wi „tower of power“, „queen“, „rolling stones“ u au dene angere topacts woni i bis itz eso gse ha.
boris, freda, claude, gary, martin, andreas, patrick u der flo spile d’songs vor nöie platte (u öppe eis zwöi cover) souverän, abklärt, u so öppis vo ufe Punkt,  sackschtarch – eifach vom finschte.
nach eme fette schluss mit bläser de der spruch „was wär di wäut ohni hörner???“
u das het mi de grad ufe titu vom biitrag bracht,
„what a world without horns“
i bi froh, het der böru d’hörner entdeckt, nid öppe, dass das woni vor gfüete füfzg jahr vo ihm gse ha nid wär guet gsi, sicher nid aber d’variante 2016 trifft haut vou mi gschmack, eifach obe use!
d’iiladig a di cd-toufi het mi wahnsinnig gfröit u d’atmosphäre nachem gig ir garderobe vor mühli isch familiär u entspannt gsi. nöii bekanntschafte hie, chli smalltalk da u plötzlech ghöri dr böru säge, „eso bands wi mir gitz e million“… zahlemässig ma das ja stimme aber qualitativ si si für mi i de top 10 vo däm genre.
sig’s wis wöu, abgrundet isch das 40-jährige jubiläum de mit ere wunderschöne turte vor rhonda worde, so quasi z’tüpfli ufem i.
merci viu mau für dä wunderschön abe! (click the pic)
what a world without horns